蘇永康紅館開騷搵黃子華做湊仔公
蘇永康（阿公）相隔近八年再踏紅館舉行《ALL THAT JAZZ（& POP）LIVE》演唱會，好友兼兒子Jazz的契爺黃子華出心出力拍攝演唱會宣傳短片，片中他一頭型仔白髮飾演契爺角色，穿起圍裙抱着BB公仔，表示會提供湊仔服務，現場又有中西樂隊，見他每個細節連相架也很着意，其中一幕他抱着BB公仔扮餵奶，發覺奶涼了，將整支奶向後拋，正好落在銅鑼上，而Jazz亦有出鏡，看到爸爸唱歌即手舞足蹈。
十幾年前「撻着」
子華坦言不會做演唱會嘉賓，笑言如此落力宣傳，是因為收了阿公一間樓，子華說：「咩原因咁幫忙？因為佢買咗間樓畀我，講明我可以一直住，住到第日個仔大再畀番佢，哈哈！」提到兩人的友情，原來早在十幾年前萌芽，當時在橫店拍戲，孤男寡佬日對夜對，中秋夜同坐黃包車上賞月，子華講笑說：「嗰一刻我已經覺得我哋兩個應該喺埋一齊o架啦！但係我唔能夠，所以……依家咪當咗佢個仔係我個仔囉！」
送金幣上契
阿公說大年初一時帶兒子拜訪子華，提到將於6月21及22日紅館開騷，對方用兩秒便度好宣傳短片主題，並拍心口話幫手拍，夠晒朋友。他稱子華好錫Jazz，上契送富格林金幣又送玩具，快將兩歲的Jazz不太喜歡男人，唯獨鍾意同子華玩，問到開騷可放心交兒子給子華代湊？阿公說：「放心，我驚我個仔玩謝佢多啲！」
另外，阿公與太太Anita日前為車婉婉主持的節目《1+1+1》擔任嘉賓，婉婉大爆他當年在陳奕迅的婚禮上看中Anita，全程坐在身邊，郎情妾意，亦見證兩人由拍拖、結婚到為人父母。
