雨僑羅力威儲夠彈藥入票抽新樓

歌手雨僑和羅力威結婚將近一年,已成功儲錢置業。日前雨僑現身元朗睇新樓盤,據知最後未揀到心水單位。昨日她捉埋老公羅力威入票,見戴白色Cap帽的她與穿白色長袖Tee的老公在示範單位售樓處內,與地產經紀密斟,今次二人睇中紅磡新盤。

雨僑昨日受訪時承認想置業:「係呀,上次抽唔到,今日又再抽囉,睇到啱心水都會試吓抽,唔係咁易,碰吓運氣。」不過她稱只是入票,待抽到好籌先決定,故叫埋老公到場博多個機會:「各自入票,睇吓邊個好彩抽到,但要等下星期先知結果。」而羅力威亦說:「今日係同老婆去睇樓盤,一齊試吓抽,希望機會大啲,嗰度啲單位由2百幾呎到4百幾呎。至於放租定自住,呢啲抽到先諗。」