何廣沛谷行麒麟臂操到喘晒氣
向來Sell靚仔的何廣沛最近預告操肌做大隻男，勢令觀眾眼前一亮。日前他到健身中心瘋狂做Gym，個多小時幾乎冇停過「舉鐵」，雖然操到面容扭曲兼喘氣，但無損他毅力，谷到麒麟臂勁粗碌！
飛躍進步男藝人何廣沛將拍攝無綫旅遊節目《3日2夜》，預告到陽光與海灘奉旨晒肌。日前他被發現到健身中心做Gym，起初他坐埋一邊密密食，飯盒內全是清淡雞肉，見他食到苦口苦面，即使好友兼教練李日昇撩他傾偈都冇乜反應。
食得清淡嗌慘
之後廣沛做了多個器械訓練，主力操胸肌及手臂，10多分鐘後開始咬牙切齒，但依然繼續奮戰兼愈舉愈重，完成了10多組運動的他開始面青，但此時另一位教練Roy出場，幫他操練手瓜，見廣沛擰擰頭後再操，經過半小時狂舉，一雙麒麟臂谷到勁粗壯。精力耗盡的他需坐低回氣，仍不忘玩手機覆Message，未知是否向緋聞女友朱晨麗匯報成果。
事後廣沛接受電話訪問時表示，近日跟大隻佬郭子豪及李日昇操肌：「監製冇同我講要我準備啲咩，但我覺得操定先，一定冇死。（目標幾大隻？）冇追求數字，只希望畀觀眾眼前一亮、脫胎換骨嘅感覺。（練習最辛苦係咩？）邊拍劇邊抽時間做Gym，同埋大時大節要戒口，食得好清。」問到朱晨麗對他有何期望？他笑言：「身邊好多同事覺得我要食健康飯盒好慘，但個個都好支持我。」