何猷啟秘婚1年追龍鳳胎

猷啟Sweet自爆與女友已於去年結婚！

27歲的何猷啟在2017年聖誕節認愛，兩個月後宣布向女友求婚成功，但婚事遲遲未有消息，猷啟昨日以總理身份出席東華三院董事局春節團拜，被追問婚期時，終自爆去年已與女友註冊結婚。

希望今年補擺酒

他說：「其實我已經結咗婚。（幾時？）舊年，喺海外註冊，已經有一年喇！屋企人有見證，媽媽有去觀禮，依家仲爭補擺喜酒，至於幾時就未定，希望係今年內！（等爸爸出院先？）等家人冇咁忙先。（太太喺香港住？）係。（帶太太同爸爸拜年？）有！有帶佢去（扌豆）利是。」問到賭王身體狀況如何？他說：「冇乜事。（幾時出院？）暫時都未知。（爸爸催你生B？）呢啲要順其自然。（想生幾多個？）冇特別，兩、三個囉！」問到與家姐何超蓮是龍鳳胎的他，可會想生龍鳳胎？他說：「希望啦！」

放大圖片	翁嘉穗會放更多時間照顧囝囝。

翁嘉穗：細仔冇咁黐我！

此外，總理翁嘉穗及副主席譚鎮國亦在場，翁嘉穗透露未來一年將會卸任總理一職：「今年自己都好盡力參加東華活動，但新嘅一年，想放多啲時間喺屋企同埋公事上面。（係咪囝囝投訴你冇時間陪佢？）咁都發覺細仔冇咁黐我，因為夜晚多咗活動要出街。出年佢就讀K2，又要預備讀小學，依家幼稚園都有三、四樣功課要做。」