姜濤破「色戒」飯局有女陪
男團MIRROR其中三子姜濤、Anson Lo及Anson Kong前日與過百名Fans歡度情人節，舉手投足都引爆Fans的熱情，現場尖叫聲四起。他們又自爆有女陪食燭光晚餐，不愁寂寞！
活動上，姜濤、Anson Lo及Anson Kong（AK）獻唱之餘，又與Fans玩遊戲，最後更大派姜糖及朱古力，近距離接觸冧Fans！問到情人節有甚麼節目？他們表示活動後一齊食飯慶祝：「MIRROR其他有女朋友嘅成員就自己慶祝。（你哋全男班唔Dry？有女伴？）有花姐！」並急急澄清還是單身。
AK Anson唔拍拖
問會否恨拍拖？之前傳出緋聞的姜濤似乎已嚇破膽，一講到拍拖話題即不停以「盡量避免」回應，可謂見過鬼怕黑！他希望避免不必要的誤會：「同嗰個女仔係普通朋友。（有緋聞好驚？）好驚！（你驚定佢驚？）依家盡量少聯絡，可免則免，相信喺呢份友誼入面，佢了解我嘅處境，因為少少舉動就會引起誤會。」而Anson Lo表示以工作為重，AK亦暫不想拍拖，他說：「工作好密，想奉獻番啲Fans，答謝佢哋支持。」
錫到肥仔爆缸
談及早前在節目上玩遊戲時，與另一男團ERROR的隊長肥仔互獻螢幕初吻，姜濤澄清不是錫，而是咬：「我咬咗落佢個嘴度，但你哋理解成錫都得，下次盡量避免。（Fans睇見你錫佢，有冇妒忌？）有咩好妒忌？」又自爆整損肥仔個嘴，搞到對方即場爆缸：「我門牙咬到佢，之後佢要消毒。（好尷尬？）唔會，肥仔係我嘅朋友、師傅，仲係我嘅學習對象。」
