追求者排到對面海 祖兒：發吓夢得唔得？！
樂壇天后容祖兒昨晚出席活動時被問到情人節「有冇着落」？她搞笑指有大批追求者，一籮籮排到對面海！之後笑言只是吹水「發夢」，情人節繼續Dry住跟家人過。
容祖兒、周柏豪、王敏德女兒王曼喜及王麗嘉、「美女學徒」余潔滢、胡子彤等昨晚出席時裝品牌活動，之前宣布與劉浩龍分手的祖兒透露情人節跟家人食飯，並指新春期間都沒有拜年：「成個新年花咗兩日時間同阿媽喺日本，之後我去韓國做嘢，冇時間拜年。」
她又說尚未收到好友「阿嬌」鍾欣潼的利是，但昨日她「開工大吉」有派利是給鄭裕玲：「都覺得冇大冇細o架！（佢有冇派番畀你？）咁又冇，大家都係抱住問號心情去派同收。」
你黐我時我黐你
講到情人節與媽咪過，她說：「好開心，我有好多節目o架！我推晒咋！你以為我冇人約咩？好多o架！一籮一籮人排到去對面海呀！（一籮幾多個？）十二個……唉！你哋畀我呢啲單身人發吓夢得唔得？我係冇人約……（心急搵男友？）冇！心情都係工作上，要六根清靜，工作好多，Handle唔到多樣嘢，我演唱會後好精彩，會去東非同希臘旅行，同朋友去。（想發展異地戀？）乜戀都得！（同咩朋友去？）咪阿Sa（蔡卓妍）囉！（你阻住佢二人世界？）唔會，佢約我o架！當年佢孤家寡人都會黐啲Trip，依家到我，總之大家互黐啦！」
王麗嘉網上騷胸
曼喜及麗嘉打扮密實，問是否打算封胸？麗嘉說：「唔會喎！今年做咗內衣品牌代言人！父母幫我簽合約，都好支持。（有冇諗過影全裸寫真？）唔會喺香港出，市場唔係好啱，我會選擇自己影再放上網，唔會出書，覺得有啲恐怖，好多鹹濕佬會拎住本書。」
柏豪送樓頂幾年
柏豪前晚情人節做騷無奈「丟低」老婆：「佢好大方嘅，又唔一定正日先慶祝嘅。（送咗咩？）冇呀，呢幾日感冒，冇時間準備。」
早前他已送樓給太太，相信禮物已夠大份，笑言可「頂幾年」：「之後仲送裝修、傢俬，頂住先啦！（咁太太送咩畀你？）都冇！我哋唔搞呢啲好多年喇！平時睇啱咩已經即刻送。」