張繼聰街頭唱情歌冧爆謝安琪
「愛妻號」藝人張繼聰前日向太太謝安琪送上一個難忘的浪漫驚喜，帶她到尖沙咀海旁，並問年輕人借來結他即興向她獻唱張學友名曲《每天愛你多一些》，冧爆的Kay在人群中聽得如癡如醉。他將片段放上網並留言：「老婆話唔要啲物質禮物，但係要難忘嘅、冧豬嘅、幾十年後都記得嘅。於是我帶佢去海旁，問班年輕人借咗啲架生。」他並多謝借出樂器的年輕人，更向Kay表白話要「每天愛你多一些」。而該片原來由剛巧偶遇的歌手周國賢負責操刀，他亦有拿起結他自彈自唱引來圍觀粉絲起哄。
杜汶澤網上譴責
張繼聰接受電話訪問坦言：「係路過嘅即興決定！其實都好驚青，不過人一世物一世，為咗氹吓太太，膽粗粗試吓。同埋人愈大愈懶愈冇膽，好多嘢第時可能真係唔會或者唔敢做，但係又好想令佢笑吓，所以癲一次。」
杜汶澤在社交網轉載他的片段，更發文譴責：「藝人張繼聰昨夜在情人節於尖沙咀海旁，當眾向其妻子大唱情歌，場面感人！本人予以強烈譴責，張某把愛妻表現平均線在一夜之間急速拉高，喂！兄弟，畀條路行吓好喎！你咁樣我哋好難做人喎！」
