寶兒嘉琪秀文搶客 倒貼送抱
無綫小花張秀文、梁嘉琪及張寶兒等「是非精」組成「無敵豬隊友」，合資6位數在年宵擺檔，靚女為拉客出盡法寶，除簽名影相外，嘉琪還嘟嘴賣萌，秀文則送上「愛的抱抱」！
先後合作節目《學是學非》的張秀文、梁嘉琪、張寶兒、馮盈盈、湯洛雯及鄺潔楹感情要好，故決定夾份在觀塘年宵擺檔，其中秀文、嘉琪及寶兒前晚看檔，獲劉穎鏇及丁子朗等探班。見三女用咪高峰落力叫賣，吸引數十途人圍觀，男女老幼都爭相合照及攞簽名，識做的嘉琪嘟嘴賣萌，秀文則送上抱抱，場面墟冚！
咕(o臣)攬過至賣
首次擺年宵的秀文自爆一開始「倒瀉籮蟹」，很多東西都不懂，要靠別人教。今次她們合資6位數，全部產品都是自己設計，最開心是有街坊日日支持，問到生意如何？她們笑說：「有我哋喺度就零舍好，所以我哋日日都要喺度，一唔喺度就『選情告急』。」問到有甚麼拉客必殺技？秀文笑言除了影相、簽名外，客人還可與她「間接抱抱」：「我哋個個咕(o臣)都攬過先賣出去，將啲好運帶畀全世界！（有冇信心賺錢？）我哋計過數，賣晒都賺唔到啲咩，旨在做善事同玩，其實我哋影相多過賣嘢。」
拜年無懼催婚
談及農曆新年，秀文表示要好好休息，寶兒則會與男友袁偉豪互相上門拜年，問到親戚可會催婚？她笑說：「暫時大家都好明白事理，冇催。（諗住幾時結婚？）暫時唔會住，大家都鍾意工作。」講到男友在網上為她出頭鬧爆無禮司機，她讚男友一向正義，雖然可能太激動：「都合理，佢喺自己私人平台發表啫。（欣賞男友咁正義？定叫佢唔好咁衝動？）呢個係佢嘅性格，作為另一半接受佢，每樣嘢都有好同唔好。（佢唔抵得你畀人蝦？）哈哈，多謝佢！」