張學友完騷驚冇嘢撈變失業歌神！

經歷兩年多，張學友由2016年10月在北京展開演唱會後，前晚在香港紅館舉行《學友．經典世界巡迴演唱會－香港站．再見篇》尾場，合共233場巡唱令他刷新世界紀錄，成為全球開最多場次巡迴演唱會的華人歌手，成績驕人。據知，他每場歌酬達150萬，估計233場巡唱為他帶來高達逾3億的酬勞，認真和味。

喊住話不捨

前晚是學友共15場紅館騷最後一場，他繼續全力以赴演出，大女張瑤華亦如常現身支持，更坐在頭排，邊唱邊揮動螢光棒為父親打氣，十分投入。到握手位時，囡囡握埋一份，真是爹哋的「鐵粉」。期間學友表示希望再開個唱，想打破自己紀錄。唱功及舞功同樣厲害的他自嘲雖然57歲，但跳舞竟好過35歲時，故再過10、20年應該會跳得更好。尾聲時，他多謝家人及大家支持，更忍不住落淚稱不捨得演唱會完結。

騷後舉行祝捷會，他笑言有失業的感覺：「第一件事諗聽日點呢？下個禮拜又點？都冇嘢做喎，有啲唔知做乜好嘅感覺，因為過去兩年都好機械式，好規律。」問到是否開始構思一直想做的音樂劇？他說：「希望可以，因為講咗好耐，但唔係話做就做到，演唱會就可以自己決定一手一腳去搞，但音樂劇要搵人寫古仔、寫歌，呢個唔係自己範疇，一靠人嘅嘢就好難，盡快啦。」

大女張瑤華興奮與老竇握手。	學友完騷時喊住話唔捨得演唱會完結。	巡唱破晒紀錄，學友演出空前成功。

開心與囡囡多話題

講到大女又來捧場，學友表示：「咁老婆都有嚟，佢坐咗喺控制台上面，阿女都睇咗十幾場，細女就因為返學，睇咗5、6場。（大女睇得好投入，係你fans？）佢以前唔係o架，所以今次算係一個收穫，最主要係多咗話題。（阿女睇完有冇讚你？）有呀有呀。（囡囡坐頭排握手。）都握咗幾晚啦！」問到囡囡是否有興趣唱歌？他先說「冇可能」，但之後又說：「唔可以話冇，每個人都可以嘅，但佢唔係鍾意表演嗰種。」