準碩士徐子珊忙寫論文愈食愈瘦
久未露面的徐子珊為新劇宣傳探訪長者，其身形愈來愈「S」，原來與讀心理學有關，笑謂因忙寫論文致壓力大，食量少。
邵氏網劇《守護神之保險調查》演員苗僑偉、黃宗澤（Bosco）、劉心悠、徐子珊等，昨日於葵涌出席「慶團年盆菜宴」探訪長者活動。子珊的身形愈來愈弗，她笑言：「冇特別Keep Fit，只係依家讀緊心理學碩士最後一年，忙緊寫論文，壓力好大，自己都好緊張，所以食少咗野。之前試過一邊拍劇一邊返學都幾辛苦，所以想趁新年假期寫論文，因為新年之後要開工。」
坐輪椅照拍打戲
問她可有輔導負腳傷的Bosco？她笑說：「我諗佢冇創傷後遺症，佢冇事啦。我都未有資格去輔導人，遲啲可以做吓心理醫生或者病人角色。」
而早前拍劇受傷的Bosco，仍要撐着拐杖見人，他說：「已經拆咗石膏同埋拆咗鋼釘，依家做緊物理治療，希望過年後好番。」問到可有影響劇集埋尾？他笑說：「我年廿八就收工，佢哋已經慣晒，戰場有輪椅、高櫈同拐杖，打戲都係坐喺輪椅度打。」
苗僑偉初三搞團拜
苗僑偉笑謂給Bosco多點打戲「優待」他，因有替身代勞。而Bosco透露年初三會到苗僑偉屋企拜年，他說：「梗係要佢煮鮑魚畀我食，食番佢八隻補番，仲要食鵝掌。」