沈震軒爆缸超能膠止血

歌手沈震軒（Sammy）昨日拍攝音樂微電影，騷肌及晒身手吸引眼球，但透露日前拍攝被酒樽扑頭的場面時弄假成真，額頭留有傷痕。他指道具酒瓶由糖膠製成，瓶內盛滿真酒：「扑落嚟之後覺得『醃眼』，以為係真酒嘅關係，點知原來係血！工作人員話冇加血漿喎，先知真係扑爆頭流血，啲血不停流，好彩現場外籍武指Chris當過兵，用咗一個方法即時急救止血，竟然係用超能膠，個傷口好快止咗血，之後去睇醫生，佢聽到用膠水都好愕然，但都話啲膠會慢慢分解番嘅。」