羅霖立平安紙防家變
「美魔女」羅霖昨日以自家酒舖老闆娘身份，出席新蒲崗Mikiki廣場的「型」新春市集。她透露今日飛馬來西亞參加睇樓團，興奮指今次出埠有三大好處：「可以睇樓、賺錢、旅遊，當地係我想置業嘅地方，嗰邊房價同香港冇得比，亦都啱港人投資，食物啱食，語言又溝通到。我預咗七位數字，諗住平平哋買間屋先租畀人，遲啲用嚟養老。」
問到可會順道替三個兒子置業？她笑言若有能力都希望選「香港磚」，又打趣指要買一間屋讓三人平分：「買三間就難啲，香港樓價太貴追唔到，希望佢哋大個有能力，唔好靠屋企。」之後自爆已立下「平安紙」，兒子亦有過目：「都係平均咁分，等佢哋唔好以為媽媽偏心。依家新時代，作為父母應該一早畀佢哋睇，心入面先唔會有猜測，睇完冇比較會開心好多，所以明爭暗鬥呢啲唔會發生喺我屋企。」