張家輝撩再鬥戲青雲落閘：夠晒喉
影帝級張家輝和劉青雲闊別5年，最近再次雙劍合璧合作賀歲片《廉政風雲 煙幕》，更升級至隔空鬥戲。家輝直言未過夠戲癮，出盡口術引誘青雲，指對方若答允再結片緣，任何要求也統統開綠燈，惟青雲卻請家輝食檸檬，抵死指今次聚頭已夠晒喉，反之對戲中經常向分居妻子林嘉欣講陰毒單打對白感興趣。嘉欣就難忘化身動作演員被車撞，但現實卻冇膽向打女進發！
集合兩大影帝張家輝、劉青雲及影后林嘉欣助陣的英皇電影《廉政風雲 煙幕》，昨日開始在戲院預售，反應熱烈，氣勢如虹，相信這套賀歲猛片定必在大年初一突圍而出。雖然同期有不少中西猛片，但眾演員遇強愈強，一副冇有怕姿態，更將出發內地不同城市作巡迴宣傳。為配合電影主題，三位主角早前到咖啡店拍攝宣傳片，青雲和嘉欣即席學炮製咖啡，相反身體未能承受咖啡因的家輝，卻安坐梳化扮顧客，非常梳乎！
夫妻嗌交爆陰毒
飾演逃走證人的張家輝，繼5年前電影《掃毒》後再與劉青雲合作，今次卻非上司下屬，而是身份對立，家輝戲份集中於澳洲，演廉署調查主任的青雲則主力在香港拍攝，故二人大多隔空過招，鮮有同場戲份，錯過了影帝互相飆戲場面。問到家輝是否未過夠戲癮？他說：「將來應該有機會再同青雲哥合作。（佢話你做導演唔敢合作喎！）我點會吖！佢肯拍我嘅戲嘅話，佢話點就點啦！（同嘉欣三角關係？）其實同嘉欣冇感情戲，佢係青雲太太，我就暗地想佢夫妻關係改善啫。」
近年主攻拍打戲的他，今次以文戲為主，可謂晒盡影帝演技，家輝笑指雖然比打戲舒服，但面對冗長對白，內裏還不乏法律專業用詞，令他睇到都驚：「要提早背對白，反覆去背，喺澳洲成日做宅男背稿，希望可以流暢啲。」
而青雲對於家輝這位舊拍檔，不諱言與5年前一樣健談兼好動，對於二人似未過足癮，他即搞笑謂：「我就覺得夠喉啦！火花唔一定要成日同一場戲，有張力就得。（咁同嘉欣又點？）一開始講我哋分居階段，導演要求有一場激烈嗌交戲，但唔係要大聲，而係要講陰毒嘢，平時我個人開朗型，唔係啲咁嘅人！」
被車撞一Take過
至於首度與青雲合作的嘉欣，卻遺憾完得太快，笑指雙方全程以電話溝通，故經常要憑空想像對方樣貌。談到激烈嗌交戲，嘉欣說：「呢樣嘢好易投放，因為夫妻日常都會發生，記得導演當初搵我係想我發揮感情戲，第一日就拍嗌交戲，我同青雲好快搵到默契，好多人話佢唔講嘢，其實都好多嘢講，幾有趣。另方面導演又安排追車戲同畀車撞嘅戲我，仲要一Take過，真係好驚，我呢方面係零技巧。（諗住轉型動作演員？）佢哋話我係新打女，但千祈唔好搞我，我唔得o架！」
硬闖澳洲雪山
《廉》片遠赴澳洲多個地方取景，隨隊的是張家輝和客串演出的袁富華（Ben Sir），當中雪地場面是重頭戲，劇組更特意登上雪山，在零下十幾度下進行拍攝工作。雖然等候期間下着大風雪，卻無阻Ben Sir興奮心情，更特意下車感受風雪。
家輝全程均表現專注，不斷與劇組溝通，務求完美地配合拍攝。為了這套戲，他更在澳洲逗留了接近一個月：「喺悉尼都拍咗三個星期，加上雪山嘅三至四日，都差唔多一個月。」
陳家樂恨前輩教路
片中雲集多位實力派猛將，更有影后袁詠儀（靚靚）特別演出，靚靚笑言：「我本來想推，因為對白太長，後來麥兆輝解釋角色背景，又同青雲演對手戲，令我更加想演。」自《新不了情》後，青雲與靚靚已成為戲迷心目中的最佳拍檔，今次在新戲久別重逢，她說：「雖然私下交談唔多，但青雲無疑係同我最有默契嘅好拍檔！」
方中信飾演青雲的廉署上司，陳家樂和湯怡則是青雲的下屬，難得與影帝對戲，家樂坦言渴望得到前輩的評語和意見，但往往不敢開聲：「青雲隨時隨地都喺角色狀態中。」當青雲在拍攝現場分享個人小故事，湯怡也會豎起雙耳用心聆聽，她說：「青雲會問我哋幾多歲，然後話：『嘩，依家先至三十歲？你哋仲有排捱呀！』」
攝影：劉斌、吳文聰
嘉欣化妝：Shuen Kong
髮型：Hin Wan
服裝：IRO by ITHK