糖妹激罕性感即場換衫

藝人糖妹（黃山怡）昨日以活動大使身份出席日本祭活動，穿上Deep V鮮黃色連身裙的她小露性感，席間由日本國寶級大師幫糖妹極速「變裝」，換上有朱古力味的特別和服，她笑言是首次公開於台上換衫：「雖然條裙低胸少少，但都黐好晒膠紙，本人好安全！同埋件和服都係着喺外面，相信大師會好好咁幫我。」眼見現場布置猶如小日本，她表示希望再帶雙親到當地遊玩：「想去Road Trip，趁佢哋身壯力健去多啲地方。（係咪你埋單先？）不嬲都係！卡都係碌我o架！畀咗張附屬卡佢哋幫我儲里數。」問到可會想拍旅遊特輯？她表示今年主要與糖兄「復合」唱歌，更抵死笑言或可於日本拍MV、影封面：「一條龍服務，不過都係學好日文先，之前學過啲，但好似冇咩天分。」