退燒即復工田蕊妮攬啜曹永廉！
藝人田蕊妮前日因流感發高燒被迫停工，昨午她「秒速復工」到旺角為新劇《她。她。她的少女時代》拍攝。受訪期間阿田聲沙沙，似乎病菌未清，不過由於台前幕後計劃農曆新年前煞科，她惟有「繼續努力」：「依家冇發燒嘞，不過今次病情嚟得好急，周身唔舒服，從未試過咁，有死嘅感覺。昨日返到屋企，除咗食藥同食嘢就係瞓覺，今朝助手話我個樣仲精神過平時！」
阿田更搞笑謂已傳染給老公杜汶澤：「所有嘢都要同佢分享，佢只係初期，冇我咁嚴重，佢亦睇咗醫生。（因病取消同曹永廉露營戲份？）係，今晚再露過。佢去咗雲頂登台幾日，有啲掛住佢，今晚見到我會擁抱同咀佢！」
