李施嬅摷勻黃致豪
無綫花旦李施嬅在重頭劇《法證先鋒IV》飾演法醫，近日拍攝驗屍戲的她指黃致豪的Body最正，已給她摸勻全身，雖然通宵拍攝，但都醒神刺激。
《法證先鋒IV》演員譚俊彥、李施嬅、黃浩然、朱晨麗等昨日在將軍澳電視城為劇集拜神，李施嬅在劇中飾演法醫，近期晚晚通宵拍攝驗屍戲，無論男女演員也要脫去衣服，穿着內衣褲扮屍體演出，她笑說：「每晚都好醒神同刺激，佢哋好專業，有場戲要驗下陰，嗰位女演員真係擘開對腳，犧牲好大！最正梗係驗黃致豪，佢就唔使驗下身，但係其他地方就畀我摸過晒，哈哈！」她又表示日前去看醫生，被指血壓偏低：「醫生都問我點解仲行到路，其實有時行路都會搖晃。」
黃浩然則坦承拍這部劇都辛苦，經常唔夠瞓，試過由早上六時拍到凌晨四時，幸好大家互相鼓勵。
朱晨麗節食騷Body
譚俊彥最近與中學同學合資開西式餐廳，正在試業，他還「父子兵」上陣帶着兒子到街市買餸及下廚。而到餐廳試過菜的朱晨麗大讚他煮得一手好餸，是廿四孝老竇、老公及老闆。朱晨麗透露稍後要為劇集以運動Top上陣，為此要開始操弗Body及節食，譚俊彥笑說：「唔好食咁多，唔係啲『豬腩肉』走出嚟。」
另外，劇集總監製梅小青大讚謝賢（四哥）演得好，四哥則謙稱很久沒拍劇，自覺有點生疏，米雪則讚他不但演得好，Chok甫還很厲害。