張敬軒獎座晒冷霸氣爆褲
張敬軒稱霸本年度樂壇頒獎禮，昨日出席活動時，將所有獎座大晒冷，霸氣十足的他竟然同場加映「爆褲」出洋相，急急召造型師上台救駕。
「獎王」張敬軒昨日於自家法國餐廳舉行答謝宴，將本年度所奪得的獎座一次過拎出來「晒冷」，甚有氣勢。軒仔甫上台即尷尬笑言先請一位特別嘉賓上台：「造型師請上台，我條褲褲頭爆咗，驚甩褲！」全場笑爆，造型師即走到他身後幫忙整理。
隨後他逐一多謝一直支持自己的客戶及各個單位：「呢行好現實，要配合天時地利人和。」期間有粉絲上台送紀念品，包括一條「波叔褲」，他收到時笑不攏嘴。
冇錢埋單賣名錶
軒仔表示今次答謝宴由公司「埋單」，但當被提醒由他自費時，他笑說：「早知係咁就食龍蝦，羊毛出自羊身上，但開心嘅，因為老闆（楊受成）都有獎勵我，送咗隻炒價名錶畀我，都值10幾萬，或者唔夠錢埋單就拎隻錶出嚟，哈哈。」又稱稍後會再與同事慶功，並宣布11月與中樂團合作開騷。
笑關智斌五穀不分
談到新一年計劃，他稱會繼續出碟，但會加強網絡宣傳，問到是否轉行做網紅？他笑說：「咁易咩？係一門好高深嘅學問。」提到關智斌主持網上煮食節目，可會上對方節目大顯身手？他笑說：「會中伏，我唔敢食佢煮嘅嘢。（挑佢機？）謝霆鋒第一，第二係唔係我唔知，但我一定贏關智斌！佢煮嘢食係新丁，聽講佢墨魚條軟骨都唔知係咩，我阿媽會話呢啲人係五穀不分。（踩佢喎！）唔係，唔識咪學，虛心啲打嚟問我，我可能會教佢。佢強項係做運動，就快轉做運動員。」