吳若希「哭訴」：妒忌柏豪

星夢歌手吳若希（Jinny）、周柏豪、菊梓喬（Hana）、胡鴻鈞及戴祖儀等，昨日拍攝賀年特輯。傳不和的Jinny及Hana齊齊「拆彈」。提到日前《勁歌金曲頒獎典禮》的「花生事」，當晚浮誇大笑賀Hana得最受歡迎女歌星的Jinny「自抽」表現好精彩：「其實我笑同唔笑都衰，不過係過度激動嘅。」

搵老闆反映

問到當晚反應為何如此誇張？她指當時是笑自己，又打趣說早知就缺席頒獎禮：「心諗又要畀人影相同寫不和，要申請以後唔同Hana一齊坐！咁就唔會畀人講，真係好攰、好辛苦！呢劑嘢要同老闆反映，你哋（網民）唔好將心入面諗嘅嘢當真。」她續指真心覺得師妹得獎沒問題：「冇咩好唔開心，我唔去頒獎典禮同唔攞獎都可以，但公司嘢要支持。」提到上載的大合照沒Hana，她即求饒：「佢行開咗！張相冇佢唔代表不滿佢！」又自爆另一件「不和事件」：「柏豪坐我隔籬都冇影佢，因為我不滿佢，同佢不和！假嘅嘢唔使拎出嚟討論，真嘢唔怕講！」說畢即伏在師妹肩膊扮喊，Hana亦識做拍膊頭安慰！與柏豪「不和」的Jinny繼續說：「我妒忌柏豪靚仔！憎恨所有靚仔過我老公嘅人！」柏豪聽完得啖笑。

星夢歌手齊集拍賀年節目。

三大「仇家」同場，講完一輪握手和解。

同連詩雅惡鬥

柏豪之後為「星夢一姐」爭奪戰做和事老，問到新加入的連詩雅（Shiga）會否加入戰團？他聞言即抵死掉瓜子笑說：「佢未有資格相提並論！」最後「不和三人組」握手作世紀大和解。Jinny同晚偕老公何兆鴻參加慈善演唱會，笑稱要與Shiga「死過」：「我哋同期出道，當年競爭好大，相信會延續到今年。」

另外，菊梓喬昨日在網上發文，列出四點澄清外間的指控。她先指出沒虛報年齡，身份證寫明出生年份是1986年；她沒改名換姓，「菊梓喬」是其藝名，亦得到父母同意採用；她否認曾買點擊率，直言「有多餘錢，我寧願拿去交租食飯」；最後指出未曾感人生悲慘，反而令她更珍惜所有，強調「不尊重別人，但請尊重自己。」惟未幾便刪去留言。