麥明詩心急會教練臨別一操

「十優港姐」麥明詩（Louisa）昨日穿旗袍現身銅鑼灣Fashion Walk，出席《芝麻開運「型」新春》揭幕禮，由5位《芝麻街》明星帶領進場。期間她舞動身體配合音樂節奏，表現Hyper。自台慶後再獻舞技的她笑言：「新年要有新願望，改善自己做得唔好嘅地方。（有花時間排舞？）喺腦海排，都覺得自己表現好好。」

「希望佢嚟到」

明日出發踩單車去柬埔寨的她表示，心情興奮又緊張：「今次離開香港咁耐，都約咗朋友食飯。」又笑指行程中逆來順受：「教練話我可以快啲，早兩日去大帽山由山腳踩上山頂，都算係2019年完成咗一件人生未完成過嘅嘢。」她笑言幸好屆時有靚仔拍檔潘梓鋒相伴：「望住佢當動力去踩。（咁教練胡健燊呢？）佢可能後半Part先嚟，希望佢嚟到，就可以畀好大強心針我。」

提到早前她表示不排除與教練踩出「火花」，她笑言不知對方反應，並澄清「火花」的意思是指發展單車興趣，但隨即又讚對方細心：「佢會照顧我起居飲食，關心我有冇補充體能同營養，關心我有冇拉筋，都幾窩心。」

麥明詩「龜速」前進，胡健燊在旁指導。	戙高腳換鞋，非常豪邁！	麥明詩心急落車，冇為意着穿窿襪。

着穿窿襪落車

活動後，她急不及待飛車到西九文化區會合教練胡健燊，她在車內除定黑色長靴，着住穿窿襪落車，更豪邁戙高腳換鞋，之後再換上單車戰衣，而教練從遠處步往女方座駕，他先將私人物品放下，再陪Louis踩單車，並從旁指導。由於教練全程步行，故Louisa以「龜速」踩，操練半小時後便結伴離去，教練細心幫她拆單車放入車尾箱，Louisa則做柴可夫接載對方到附近機鐵站，然後才揸車返家。