孫佳君家有破壞王

藝人孫佳君前晚出席寵物電影的慈善首映場，問到現時可有飼養寵物？她搞笑自爆屋企有「12隻狗」：「養我嗰兩個仔等於養12隻狗，一個14歲、一個10歲，破壞力太強，又冇時停，大仔打籃球，身高有成6呎1吋，成日同細佬打交！」又自爆兩個囝囝在家中打棒球，搞到打爛電視機：「以為爆咗1吋冇咩事，但一開電視機就冇咗一半畫面，要買過部新嘅！」她指兩子想養寵物：「我就話：『養你哋都好辛苦』，可能等佢哋大個啲先，驚養咗得我照顧。」