謝安琪寸張繼聰樂壇叛徒

樂壇天后謝安琪(Kay)、張敬軒、達明一派、Supper Moment、李幸倪、AGA、鄭欣宜及吳業坤等,前晚出席《第41屆十大中文金曲『用心.聽』音樂會》,軒仔及Kay分別首奪「最優秀流行男/女歌手大獎」,Kay說:「今年做嘅嘢係冒險新嘗試,得到嘅反應好喜出望外,攞獎係好大嘅強心針,聽到大家嘅掌聲同歡呼,令我內心好『滾動』。」問到老公張繼聰及仔女可有與她慶祝?她笑言:「佢哋反而好冷靜,好平淡,可能反映屋企個地位,佢哋有時喺電視Cap張唔靚嘅相畀我,就代表睇咗。」

她又笑言張繼聰每次都話想來頒獎禮支持:「我就叫佢唔好嚟,因為佢過咗去影壇,係樂壇嘅叛徒,身份尷尬。其實真正嘅原因,係因為我哋有分工,如果一個工作到夜,另一個就要早啲返屋企同仔女玩。」Kay笑言囡囡常被家人逼在媽媽返工前講加油,並指囡囡暫時未識在電視上認到她:「見到差唔多髮型同有化妝嘅女人就會話『媽咪、一樣、靚』。」她又表明不會出席無綫《勁歌金曲》頒獎禮,三個頒獎禮合共得九個獎已很滿意。

軒仔未達標唔交棒

而軒仔就指之前漏了多謝陳奕迅(Eason):「喺我今年派好多首歌時,佢會Send訊息鼓勵我,佢畀機會我哋獲得多啲肯定,好值得欣賞。佢好錫我哋,只要佢聽到首歌好,或者點做好啲,佢都會畀意見,所以樂壇雖然市道唔好,但氣氛係好,我嘅機會喺前輩嗰度嚟,好似接棒咁,咁上下就交畀下一個。(你唔會咁快就交棒?)會畀自己目標一路一路去。」問可期望像古天樂般,歌影視獎項大滿貫?他坦言:「我做好啲音樂先啦,雖然唱片銷量同上榜成績幾好,但始終未係好似Eason、古巨基、李克勤佢哋當年嘅影響力,所以2019年要再做好啲。」