畏高韋家雄企跳驚到抽搐！

繼早前田蕊妮拍攝劇集《她。她。她的少女時代》天橋企跳後，韋家雄昨日亦危站四層樓高的天台企跳，引來大批街坊圍觀，思捷則趕往勸他冷靜。

忍半年追鼠B

工作人員為家雄做足安全措施綁上威吔，他企上天台邊緣時亦有人扶實，不過見他頗為緊張，大叫腳仔軟！事後他受訪時直認畏高，惟多年來常拍攝被吊高戲份：「記得當年拍《談判專家》，場場戲都要吊威吔，文戲都要坐過山車，監製話我面部肌肉抽搐做得好好，我話係真o架！嗰排驚到要睇醫生，不過畏高冇得醫，到依家仲係驚。」

講到新年大計，他表示仍希望拍更多好戲。去年新婚的他又表示開心不少，問到今年會否努力追豬BB？他說：「唔會喇！同我生肖唔夾，下年鼠B就好啲！所以要忍半年！」

李思捷未婚等有喜

思捷飾演落泊過氣明星，表示角色甚有挑戰性，既召妓又有不良嗜好，之後在谷底爬起身。講到新一年大計，他表示會執導及監製一部以夢幻英雄做主題的電視劇，問到已有圈外女友的他今年會否閃婚？他說：「再穩定啲先，依家年紀有番咁上下，唔想吊吊揈，會尊重佢嘅。（係咪結婚對象？）好嘅就唔好放手！（媽媽有冇催？）佢都心急，咁如果有喜事，家人都會開心健康啲嘅！」

工作人員為韋家雄綁威吔，做足安全措施。	田蕊妮早前亦拍了場天橋企跳戲，十分驚險。	李思捷在樓下緊張「營救」。