馬國明鋪路做「的哥」專車靚女

馬國明新劇中本來已有黃智雯（右），再加個譚凱琪，令他更加開心。

藝人馬國明、黃智雯、胡鴻鈞、鄧佩儀及譚凱琪等昨日出席無綫新劇《降魔的2.0》的造型記者會，馬國明表示角色會延續上一輯，問到與智雯在劇中會否開花結果？他說：「上次就冇，今年應該會啩，不過今次安排多咗個Zoie（譚凱琪）畀我，估唔到的士佬咁多靚女埋身，以後撈唔到演員就去揸的士，車靚女。」日前他現身車展，坦言經常睇車：「唔換車都睇，係一個娛樂節目。（買車獎勵自己得獎？）都想買架大車畀屋企人，不過唔急，我係理智型消費者。」

黃智雯想置業

問到雙料視后的智雯會如何獎勵自己？她直認想做業主：「2019年畀個目標自己，想買樓。（想買幾大？）唔使好大，上咗車先算。（買嚟結婚用？）唔係，唔關事，想買樓畀家人。（叫男友送畀你？）我鍾意財政獨立。」馬國明即「搭訕」說男友畀錢是「應分」，但他強調與女友黃心穎財政獨立：「出街睇戲食飯都係男人畀錢多，咁好正常。」至於智雯的角色較之前有喜劇感：「因為我多咗個拍檔C君，佢有個癖好鍾意裝人裙底，係鹹濕鬼，我仲會多咗超能力幫手降魔。」另外，飾演降魔角色的鄧佩儀晒腿上陣，她指在劇中平時打扮清純，降魔時就會性感示人。

譚凱琪	鄧佩儀着短裙仔降魔，有睇頭。	劉佩玥心想事成，果然能與胡鴻鈞演一對。

黃子恆戲份不多

而於上集有份演出的黃子恆，昨日未見現身造型活動上，由於早前爆出他搭上內地女粉絲、對方疑似墮胎的負面新聞，問到監製方駿釗是否將他飛出劇組？他表示黃子恆於續集中僅客串，戲份不多，而且上集他演的角色被惡魔附身，林凱恩懷有其骨肉，續集會有延續，但BB是否魔種或能否出生則不會劇透。