「仙氣女神」簡淑兒（Jessica）在無綫劇集《救妻同學會》及《大帥哥》中飾演的「婉婉」及「娸娸」大獲好評，但兩齣劇所有宣傳活動都不見其蹤影，即傳她步師姐周秀娜後塵，因經理人公司與無綫打官司而遭封殺！對此，她澄清與師姐情況不同，更形容自己是乖寶寶，一直處於被動狀態︰「唔清楚公司嘅安排，始終兩部劇都有好多人演出，我又唔係擔正最緊要戲份。（可惜？）畀劇我拍已經好開心，我都好珍惜機會，亦盡咗做演員嘅責任。」

有傳Jessica拒與經理人續約，因而遭公司「雪藏」才會零宣傳，她說：「冇啲咁嘅事，我同經理人關係好好。」並透露與經理人還有半年約，去向未定：「雙方簽咗保密協議，唔可以講咁多，等落實所有嘢先講。」提到周秀娜入稟向經理人公司追收酬勞，她派定心丸稱對自己冇影響︰「暫時都OK，我對盤數睇得幾緊，金額上亦冇師姐咁多。」

入行6年的Jessica熱愛演戲，但角色都非常相似，為求跳出乖乖女及秘書框架，不惜狠心捨棄固有的平蔭造型，令自己顯得更成熟，希望接到更多不同類型角色。她又自爆一路走來遇過不少挫折，一度難受到反問自己是否適合在圈中發展︰「例如遇到機會，明明覺得係自己但唔係，又有網上留言抨擊，呢啲都令自己情緒唔好。後來睇化咗，其實每個人都會遇到，係睇你用咩心態去克服，呢個世界冇人係完美！」

場地︰Speedway Diner