全城集氣成功令闊別樂壇頒獎禮多年的古天樂，前晚現身叱咤舞台首奪「我最喜愛的男歌手」，古仔被主持林海峰挑機獻唱時，即疑似爆粗，更霸氣請群星伴唱《男朋友》。

古仔憑與謝安琪合唱的半首歌《（一個男人）一個女人和浴室》，成為首位歌影視大滿貫的藝人！頒獎禮前一直未有落實會否出席的他，驚喜現身並高舉雙手致謝，贏得全場尖叫聲，一眾歌手更起身拍掌。古仔幽默地發表得獎感言：「我真係好鍾意唱歌，但唔識唱歌！好怪，有奇迹出現，行到上台攞呢個獎，真係冇嘢好講。多謝投票嘅人，你哋唔使企起身啦，好似我攞終身成就獎咁。我最喜愛唔係一朝一夕，大家最鍾意唔係我嘅歌，上年我做咗演藝人協會會長，第一個職責係想幫樂壇，用僅餘時間同歌手食飯，了解樂壇嘅變化同困難，佢哋團火係未熄過，我好開心。」

古仔更笑言要與林海峰棟篤笑，林海峰就挑機叫他唱歌，古仔即疑似爆粗，隨後叫容祖兒、謝安琪（Kay）、張敬軒及麥浚龍齊齊上台唱。祖兒提議唱《男朋友》，但古仔嫌對方太高Key接不到，之後清唱了幾句，而祖兒就一副被低Key考起，謝安琪更索性轉唱正常Key。

獲大獎的古仔未有現身慶功宴，而賽前已表明投古仔一票的祖兒，亦首奪「至尊歌曲大獎」並笑謂：「為咗集埋唱作人大獎，一於向曲、詞、編、監呢個方向去。」記者提議她寫歌給古仔，她笑道：「我發子彈一定射畀佢嘅，瞄住佢咁射。（快歌？）等佢攞埋跳唱歌手。」祖兒又爆錯「成語」：「2019年成績表寫我『開下海口』，唔係，係『誇下海口』，向唱作人進發，目標歌手係古天樂。」

至於軒仔與Kay則是男女歌手獎的大贏家，軒仔目前以9個獎領先，他笑言「9」字好意頭，有長攞長有之意。身為香港演藝人協會副會長的他，更爆會長古仔有意舉行一個可持續發展兼有認受性的樂壇頒獎禮。

而目前共奪3.5獎的Kay就首奪女歌手金獎，在慶功宴上表示：「上年一月一號同屋企人食飯，揸車聽到收音機好多朋友得獎自己好感動，但同一時間又覺得好輕鬆，因為我冇出席，所以今年就攞番呢份輕鬆出席，保持呢個心境。」