男友置業吵大鑊 馮盈盈:冇我名o架!

藝人馮盈盈、傅嘉莉及張寶兒前晚出席V City倒數活動,鬥擺萌爆甫士,盈盈透露男友「寶寶」最近置業,兩人為裝修問題鬧交,元旦慶祝亦要慳住使。

馮盈盈、傅嘉莉、張寶兒、張景淳、伍富橋及張啟樂等前晚出席屯門V City「除夕倒數派對」,期間新鴻基地產代理有限公司租務副總經理Evelyn送上願望板,讓藝人寫上新一年願望,盈盈表示今年要表演唱歌,笑言當晚只有她沒有獻唱:「我仲未練好歌,依家喺噪音方面功力就唔錯。」

上咗車冇錢結婚

盈盈透露男友「寶寶」(鍾文浩)最近置業,兩人要搞裝修及買傢俬,身為女主人的她非常投入,但大家諗法不同,搞到鬧交:「我希望可以上鏡啲畀我開live,佢就想簡約啲,惟有互相讓步。(新屋有冇你名?)冇我名o架!畀我留番首次置業Quota啦!(新一年大計包唔包括結婚?)寶寶買咗樓,冇晒錢喇!惟有再努力啲工作儲錢,我哋慶祝元旦都要慳,始終佢有供款壓力。」另外,她上節目在塔羅牌占卜環節抽到「蠱惑」的牌,塔羅師指這張牌代表雙方有一人會講大話,着盈盈要小心維繫感情,其他主持叫她下次帶寶寶一起倒數,她說:「好,下年都未散就嚟啦!」全場嘩然!

張寶兒唔諗嫁人

2018年既主持節目又開始拍劇的張寶兒,表示滿意成績:「另外想影多啲相,要Keep好身材。(影泳衣照?)咩Style都有啦,未諗呀!(搵男友袁偉豪影?)佢平時有幫我影,但仲有另一個朋友。(大計有冇諗結婚?)未有諗法,集中工作先。」

至於張景淳新一年目標是要練大隻,想有40吋胸肌、14吋手瓜及六舊腹肌,又指最近接了一套有關賽車的網絡電影,望今年能進軍內地。問到何時成家立室?他說:「呢個願望曾經放好前,但依家知要有經濟基礎先可以有家庭。」伍富橋則希望今年出EP、開騷、拍劇及多拍動作戲。