MIRROR獻身任摸 回饋粉絲

MIRROR在短短半年內由素人升呢做星，更於本月21日開處男騷，眾人感覺如發夢般，既神奇又幸運，其中十位成員日前受訪時說：「可以夢想成真係好開心。」還預告騷中含神秘環節，與企位粉絲作近距離接觸。問到粉絲可摸他們？成員Stanley不抗拒說：「平時影相、握手都好近。（有冇人要求摸你胸肌？）佢哋直接摸。」

Jeremy苦練谷肌

他們透露有Solo表演及小組表演環節，問可會騷肌？成員即笑指瘦蜢蜢的Jeremy開始練大隻，他尷尬笑言：「我試吓，盡力啦，不過我冇嘢睇，得排骨。」Stanley則說：「要賣吓關子，到時邊個會除衫，會唔會又係我除衫呢？可能唔係我(口架)，不過我哋依家練緊體能。」

眾男成軍以來親如手足，被問到會否有意見不合或摩擦？隊長Lokman說：「如果要拗，比賽嗰陣都拗咗啦，但記得有次排新歌，嗰陣太夜，大家開始鬆懈，想放工或想去玩，我就喝咗句『認真啲得唔得呀』，跟住大家就好認真，半個鐘就搞得掂。」隊員大讚他有隊長風範。

人氣王姜濤自知資歷淺，會向其他成員請教。

隊長Lokman擁有領導才能，令隊員信服。

姜濤讚老薑辣

19歲的Tiger最年輕，問他可有被「哥哥」欺負？其他成員搶答：「好奇怪，佢啲嗜好係30、40歲嗰啲打高爾夫球同篤波，根本唔係小朋友，佢鍾意人哋讚佢似大叔。」比Tiger大幾個月的姜濤自問資歷淺，故此多向年長成員學習：「佢哋喺自己所屬嘅領域入面好勁，無論工作態度定係佢哋嘅專業。」

場地：Joyland聚友坊