孖阿滕做母女惠英紅聲沙沙「喊」苦
影后惠英紅、滕麗名、譚偉權與導演張之珏昨日在銅鑼灣為舞台劇《玻璃動物園》綵排。與滕麗名首演舞台劇做母女的惠英紅，綵排時激動到喊，她說：「幾乎場場都有喊！唔習慣點得，角色好多變化，有時好激動又神經質、有時搞笑，有時又要一輪嘴講嘢，把聲最辛苦。最初都搞到聲沙沙，後嚟要用唱歌方法去講對白，用鼻腔發聲會響啲。」她又指每場戲都要換衫，記舞台走位令她最為緊張。
平日在處境劇《愛．回家之開心速遞》中演慣惡人的滕麗名，今次扮演患有小兒麻痹症的柔弱角色，笑言是大挑戰：「做開惡，內斂唔易做，張之珏導演都話我平時講嘢冇尾音，咁樣好難令人相信係一個超級柔弱嘅女仔，依家講嘢有尾音喇！」張之珏則讚兩人付出百分之二百努力，相信觀眾不會相信她們是首次演舞台劇。
