五蟹齊人！鄭少秋游說吳啟明拍電影《大時代》

（左起）：邵仲衡、吳啟明、鄭少秋、陶大宇、郭政鴻

吳啟明昨晚在中環舉行食肆開幕活動，五蟹重聚，集體回憶返晒嚟！郭政鴻表示跟啟明見面較多，但「一家人」已廿多年沒有相聚，陶大宇則笑言上次齊人時仍是Call機年代，現在已是智能電話。

啟明說：「好耐冇齊人，反而同秋官幾年前喺台北一個候機室撞到，我拎番佢電話，所以今次打畀佢。（點解神隱咁耐？）要閉關練廚藝，未練成唔敢露面，依家叫識識哋，我興趣係研究點整好最簡單嘅菜式，咁先難度最高。（復出拍戲？）做生意唔係好得閒，都有人問我有冇興趣拍《大時代》電影版，但呢樣嘢要問其他人，我small potato咋！到時先算，我叨佢哋光啫。」鄭少秋則稱「五仔爺」同場感覺親切，對於有人有興趣開拍《大時代》電影版，他說：「一於咁話。（你親自請啟明？）真係幾難，佢搞生意咁好，大計都係開多啲分店，我到時再游說佢。」

鄭少秋祝吳啟明生意愈做愈大。

胡楓被謝賢掌嘴，勁搞笑。

謝賢掌胡楓嘴

同場尚有胡楓及謝賢，胡楓透露日前兩人跟曾江食飯，笑言破冰成功：「係謝賢話搵埋曾江，曾江話有飯食當然去，於是就食咗呢餐飯。原本我諗住請，但老四（謝賢）話要埋單，梗係畀佢埋啦。佢住億元豪宅，我住幾百萬嘅，梗係食佢啦。」謝賢即搞笑扮掌對方嘴。