陳奕迅踎塔怪癖摺廁紙4變3

今年Eason相當勤力，由年頭宣傳新歌到年尾，來到年底新碟《L.0.V.E.》終於推出，之前做足9年巡唱及內地綜藝節目，掘金能力驚人，早已有過億安樂窩給家人，但近日盛傳他再斥資過億置業，日前他接受本報專訪時說：「冇，真係冇，呢個我認唔到，做人唔使要咁多嘢，但每個人需要都唔同，冇錯或對嘅！」

他稱未有興趣儲磚頭，但自爆愛儲齊某品牌不同顏色的信用卡，亦會儲起衣服附送的「士啤鈕」，全因「強迫症」作祟，令他生活上引申不少「怪習」，他不介意分享私隱：「去廁所搣廁紙係會搣4格，再摺成3格去用，因為張廁紙會闊啲。屋企擺嘅嘢，我可以用電話清楚講到每件物品係放邊個位，我啲衫係會分黑色、白色、唔同顏色擺之餘，仲要分埋牌子擺。」問是否與太太各自一個衣帽間？他耍手擰頭說：「唔使，我佔好少位就夠。（讓晒畀太太？）我同大家分享一句：『Happy Wife, Happy Life』，呢個好緊要，所有已婚男士必須知道！」

狂做運動回勇

近半年Eason予人「重生」感覺，以前腰纏豬腩肉，胖嘟嘟被歌迷直喚「肥陳」，今年竟然的起心肝做運動，打網球、羽毛球兼健身，成功變成「Fit臣」，狀態回勇的他說：「算係咁啦，其實我愈嚟愈鍾意留喺屋企，少咗好多應酬。」問是否已成功戒煙？他則說：「唔想用戒字，係停咗，戒字好大壓力，其實乜嘢都係習慣嚟，習慣咗冇就得o架啦，好似等車咁，冇嘢做就想食，我又唔鍾意玩電話，咪諗吓嘢囉！」又笑言連自己的七人車也被列作「禁煙區」：「司機話車廂內禁煙喎，少咗機會食，久而久之咪習慣咗囉！」

陪得一年得一年

人到中年，44歲的Eason不得不注意健康，不做「煙民」還自發做運動，相信太太徐濠瀠和女兒康堤最開心，他坦言：「當然啦，其實除咗阿徐，我老竇都開心，佢好憎人食煙，佢以前一路都唔知o架，直至我畀人影到佢先知，佢好介意呢樣嘢。」

出盡力宣傳新碟，正好臨近各大音樂頒獎禮，本應是收成好時候，他卻說交人大過天，現在是「年度一家三口去旅行」的日子：「係呀，應承咗好耐，佢（女兒康堤）遲啲唔理我哋o架啦，咁難得咪去囉！（同囡囡去得一年得一年？）係呀，工作幾時都可以做嘛！」

場地： The Pottinger Hong Kong

髮型、化妝： Derek Li@xenter、Karry Wong