主持東華 阿叻撐有料！志偉無綫破冰
「獎門人」曾志偉早前傳與無綫高層余詠珊不和，踩完港姐騷又公然倒戈亮相ViuTV講波，有指因此辣㷫無綫下令封殺，當時其好友陳百祥亦曾撥火指志偉：「佢睇唔起TVB！」不過，原來雙方已「破冰」，志偉今晚更會主持於電視城舉行的年度大型慈善晚會《歡樂滿東華2018》。
今次無綫跟志偉「破冰」，據知是見他已知衰收口，靜了一段時間，而志偉亦有顯出誠意，最後雙方在三星期前傾談今次合作，令持續四個月的僵局得以緩和。志偉昨晚與阿叻等在無綫秘密綵排，事後阿叻拉隊返家食大餐，同場還有參與節目的陳庭欣及劉佩玥、阿叻老婆黃杏秀、汪明荃、老友王晶父女等。
阿叻昨日回覆說：「我哋啱啱綵排完，嚟咗我度食大閘蟹宴，好多嘢食，又有日本嘢！（志偉同無綫破冰？）咁咪好囉！我就係同佢食緊隻冰船！兩兄弟有機會一齊做嘢係開心事，一個《港姐》、一個《東華》都係志偉情意結，今次佢咁啱冇嘢做，可以度期做司儀。（幫佢向無綫講幾句好話？）嘩！我都係跟住佢搵食咋，點敢呀？不過我又覺得唔使嘅，所謂有能者居之，係有料嘅，點都有得你做！」而《東華》監製何小慧說：「之前台慶都有搵佢，只係佢有電影拍冇期，今次佢咁啱有時間，好有善心，所以答應！」
阿田捐錢為「出名」
另外，薛家燕、田蕊妮及吳業坤昨日亦進行《東華》綵排，阿田笑指小時候曾經捐錢，目的是於電視機上「經過」自己的名字：「坐足成晚睇都等唔到，畀阿媽趕上床瞓！」而吳業坤自稱以東華幼稚園舊生身份出席，想藉節目幫手「尋親」：「想搵番幼稚園女同學，拎張合照出嚟，但唔記得佢叫咩名。」講到傳明年3月再開紅館騷，他笑指希望傳聞成真。