湯洛雯：我唔係咁飢渴！
藝人湯洛雯（靚湯）自去年跟羅天宇分手後，緋聞傳個不停，惟只聞樓梯響。回復單身近一年的靚湯昨日性感出席活動，坦言朋友都有為她介紹對象，但暫未有飢渴感覺，又謂想找結婚對象，所以要花時間慢慢揀！
湯洛雯昨日以紅色露肩露腿裝出席化妝品牌活動，十分搶眼。講到聖誕節將至，她表示已經約了朋友開派對：「上年我係同妹妹加佢男朋友一齊過，今年朋友知我單身，特登約我開派對。」問朋友是否介紹一些高質單身男士給她認識？她笑說：「之前朋友結婚，我做伴娘，佢一開始諗定有咩男仔介紹畀我，其實我唔係咁飢渴。我都單身咗成年，嚟緊都想搵個結婚對象，都想花多啲時間去搵，我揀人時、人哋都揀緊。」
講到早前本報拍得她有好姊妹岑杏賢和家人陪行街散心，她說：「嗰日只係睇戲，最好笑係媽咪話唔鍾意，原因係影得佢唔靚，我同媽咪講依家係話我情傷呀！」
關禮傑大女想入娛樂圈
同場還有藝人關禮傑的23歲大女關楓馨，剛於英國讀完碩士學位的她，透露正努力找一些有關教育的工作，又坦言有興趣入娛樂圈：「有咩機會我都想嘗試。（爸爸有冇畀意見？）爸爸媽媽都好支持我，我想做咩佢哋都冇所謂。」有傳無綫想簽她成為藝人，她說：「唔係真，係傳聞。（佢哋有冇接洽過你？）交番畀Nancy（關禮傑經理人）處理，我唔係太清楚，我係自由身。」講到聖誕將至，她表示會跟媽媽、妹妹去旅行，而男朋友則在英國，講到兩人變異地戀，怕不怕難維繫？她指二人每天都有視像聯絡，男友會在英國發展，問到會否跟隨男友留在英國？她說：「暫時未諗，啱啱返嚟，想陪屋企人多啲，因為都去咗英國讀書好多年。」而上山詩鈉女兒Hilary亦悉心打扮現身。