黃子恆被高層照肺入雪櫃

36歲的黃子恆近日再爆桃色新聞，一名28歲內地女粉絲Michelle自稱與他兩度發生性行為，現時懷有四個月身孕，但他突然「消失」，故決定公開其認錯的哭訴語音檔案及留言。東窗事發的子恆猶如吃了「誠實豆沙包」，承認一度欲與女方進一步發展，但堅稱雙方只發生過一次性行為，而且做足安全措施，否認是BB經手人！事件曝光後，大批網友留言狂踩黃子恆，揚言要封殺他：「衰過一次都唔知衰！冇得救」、「睇劇覺得佢幾好，原來真人係啲咁嘅人」、「見第二次就上人屋企，擺明有企圖啦！」

愁眉深鎖食NG

昨午，子恆在經理人及工作人員陪同下現身拍攝劇集《機場特警》，同場還有蔡思貝。身穿機場特警制服的子恆木無表情兼愁眉深鎖，心情明顯受損。他一埋位即專心工作，拍攝一場用手銬拘捕疑犯的戲份，但拍攝第一個鏡頭時不太順利，要重拍一次導演才收貨。完成拍攝後，見他快步欲上車離開，期間向傳媒雙手合十示意。由於戲中與疑犯一人扣上一邊手銬，他向工作人員示意未除手銬，期間問到可有與該粉絲再聯絡？他說：「我着制服唔方便做訪問。」

被爆「搞出人命」後，黃子恆頭耷耷開工，不時皺晒眉。	黃子恆指若Michelle所言屬實，他願意負責任。	黃子恆埋位後專注工作，NG完仲識笑。

回應口啞啞 抿嘴縮膊

上車換衫後，子恆再落車受訪，問到心情如何？他說：「想講嘅好簡單，呢年半冇同佢見面喇，若果佢所講呢件事係有發生嘅話，我係會負責任。（有冇再搵嗰個女粉絲？）要回應已經回應咗。」問到為何事隔年半，女方才有此舉動？他默不作聲，抿着嘴巴及縮縮膊。問到心情可影響工作？他說：「心情點都會有影響。」至於如何處理事件？他沉思十秒才再開口：「畀我冷靜吓先。」問到是否有需要時會驗DNA？他說：「如有需要我係會配合嘅。」問他有否嬲自己？子恆沒有說話，又不停將訪問咪還給傳媒：「已回應、已回應。」至於可有被無綫高層照肺？他說：「有了解過呢件事。」擔心影響形象？他只無言望住鏡頭，隨後上車離開。

對於此事，無綫高層樂易玲表示已叫子恆暫時先冷靜及專心工作，而《機》劇監製陳耀全稱不會刻意刪減子恆戲份。不過，據知他兩年前曾介入歌手裕美婚姻，無綫當時已畀足機會，如今再爆出負面新聞，有高層對他徹底失望，決定拍畢《機》劇後不會再安排新工作，其演藝生涯隨時玩完。