蔡思貝余德丞為獎出賣戀情！
藝人蔡思貝與余德丞（Dickson）關係曖昧，昨日更明目張膽上載蜜照「晒愛」，男方冧爆將頭挨落女方膊頭，還留言指二人性格一凹一凸互補不足，網友以為他倆公開戀情！原來二人希望奪得最佳拍檔獎，為獎項不惜出賣緋聞！
Dickson與緋聞女友蔡思貝同主持旅遊節目《緬甸奇幻旅程》，有傳二人因拍節目撻着，特別是他早前昏迷入院，思貝第一時間趕往探望，可見感情深厚，惟二人始終否認戀情。
性格不同但合拍
不過，Dickson昨日突然於社交網上載二人親密合照，他閉上眼睛、一副冧樣挨落思貝膊頭，畫面甜蜜，還留言表示二人性格大不同，但十分合拍：「佢鍾意睇書，我鍾意睇波，佢鍾意刺激，我鍾意舒適，佢唔鍾意畀人控制，我鍾意控制人，可能就係因為咁，當我亂咁噏當秘笈，佢會講埋我份台詞，當我認真同人溝通緊，佢會喺側邊輕鬆慢慢等……」留言倍添撲朔迷離！大批網民以為他公開戀情，大讚他們好襯，愈來愈有夫妻相！
台慶拍住出戰
Dickson之後解畫，自揭是為台慶頒獎禮的「最受歡迎電視拍檔」拉票，並寫上：「短短兩星期，四集半小時嘅節目，令我認識到呢位好朋友，希望12月16日，我哋可以一齊上台攞呢個獎，佢係我嘅最佳拍檔蔡思貝。」