袁富華條命生唔正:冇所謂啦!

出爐金馬獎「最佳男配角」的袁富華大器晚成,對於人生路上一直擔演配角卻樂天知命,經常將「冇所謂」掛於嘴邊,真心喜歡演戲的他深明追夢與發夢的分別,沒半點強求。

54歲的袁富華於劇界打滾30年,經歷過事業高山低谷,直至接拍電影《翠絲》一躍成為金馬獎「最佳男配角」。突然間變大眾焦點,過往的經歷卻教他凡事處之泰然,近日繼續為下月演出的舞台劇綵排。問到是否多了電影片約送上門?他說:「係多咗嘅,我手頭上嘅工作都差唔多喇,係時候為前途打算吓。」30年的等待要有足夠的毅力及經濟條件,袁富華坦言要養家:「冇壓力就呃你嘅!我試過有幾年冇簽劇團,去過影圈『跑散』,亦試過學人去做IT砌電腦,最終都係簽番劇團,想各方面都穩定啲。」

耳膜穿窿 考警察失敗

這位「最佳男配角」即使在現實生活中,似乎亦與「配角」畫上等號!曲折人生往往與幸運之神擦肩而過,袁富華彷彿在說別人的故事,卻是自己的親身經歷:「中學畢業去考警察,過晒關驗身先知耳膜穿咗個窿唔得,冇錢醫惟有去政府醫院排期做手術,排得嚟都過晒期喇……」

提名無數 僅一次得獎

袁富華指當初去考中英劇團,隔了半年才有第二次面試:「原來當初個考官好鍾意我,點知佢患癌……我報讀演藝學院碩士,第一年Waiting List,人哋揀咗兩個有背景、有學歷嘅人,我要第二年先被選中……喺劇界頒獎禮提名次數好多,實質攞獎只係得一次!即使之前有個『華語傳媒大獎』,我都輸咗畀同短片拍檔吳海昕。」感性的他沒有半點玻璃心,還大方笑說:「冇所謂啦!好似如果當初我考到警察,大家依家都冇機會認識我。」

服裝:Club Monaco