憑美國人氣劇集《權力遊戲》（Game of Thrones）Jon Snow一角上位的英國著名男星Kit Harington，日前驚爆背住結婚不足半年的視星老婆與俄羅斯索模偷食，索模更公開他的床上裸照！
現年31歲的Kit於2012年拍劇期間，與拍檔Rose Leslie戲假情真撻着，今年6月在女方家鄉蘇格蘭一間古堡拉埋天窗。婚後不足半年，俄羅斯年輕模特兒Olya Sergeevna日前竟在社交網自爆曾與Kit偷食，更透露Kit與Rose訂婚至婚後，兩人一直有交往。他們由男方的經理人介紹下認識，期間獲男方多次送禮，亦多次發生肉體關係！
Olya更公開幾張Kit的床照，清楚見到男方披頭散髮全裸瞓在床上，她形容照片是二人「床戰」後的情況，並爆Kit有吸毒及酗酒問題，經常神志不清及胡言亂語。雖然「圖文並茂」，但Kit的粉絲唔願相信，直指相片是P圖，更有網友認為照片疑點重重，不僅未能確定照片何時拍下，Olya亦沒入鏡，單憑一方之言難以證明真的出軌。
不過，亦有網友相信Kit偷食，更嬲到爆粗：「Kit多次背住Rose偷食？真係令人作X嘔！」又有人爆料指今次已非首次，之前Kit曾在巴西與另一女子偷食。而爆出軌傳聞前兩日，Kit仍在節目講起老婆，自言最愛《權》劇中老婆角色「Ygritte」離世的一場戲，感動之餘亦讚她表現好。