釋彥能潛水出事左耳剩兩成聽力
武打影星釋彥能早前為新戲學習潛水時發生意外，令早年拍戲被打穿耳膜的左耳再度出事，如今只剩下兩成聽力。他為另一部電影開工時，又被拳手Dave Bautista誤傷致頸椎移位，連番重創！
釋彥能憑周星馳電影《功夫》打出一片天，由入行前的28蚊月薪，捱至現時每部電影高達300萬片酬，身家達半億，可謂苦盡甘來。精益求精的他早年拍攝電影《導火線》時，搏到盡被對手打穿左耳耳膜，但仍無阻他對動作片的熱誠。
只盼不再惡化
早前他閉關近一年，積極為明年開拍的新戲籌備，配合角色學習駕駛直升機、賽車及潛水等，惟他潛至水深20米時，因水壓令左耳再度出事，他說：「當時左耳突然劇痛，我即刻上水睇醫生，情況都幾嚴重，依家得番兩成聽力，受傷嗰陣成日痛到失眠。（可以康復？）冇辦法，只希望唔好再惡化落去。」雖然永久創傷，但性格堅強的他直言明白拍戲時拳腳無眼，選擇坦然面對。
捱重拳頸椎移位
其實發生潛水意外前，他拍攝電影《葉問外傳：張天志》的動作戲亦出事，遭曾拍攝《銀河守護隊》的外籍拳手Dave Bautista誤傷頸椎：「當時我雙手被綁捱打，但佢出拳用力過猛整親我，我一度動彈不得。」為免耽誤拍攝進度，他頂硬上開工，之後邊拍邊接受治療，足足被折騰逾一個月才完成拍攝。但他表示縱使「五勞七傷」，亦無悔搏命拍打戲：「只要觀眾鍾意都係值得嘅。」