「公主抱」薛家燕謝天華面紅手震
「Captain Nancy」薛家燕為慶祝入行60周年，將於12月4及5日在紅館舉行兩場《薛家燕愛你無限60年演唱會》，前晚請來嘉賓謝天華一齊排舞，面貼面勁舞一輪後，他還使出「公主抱」冧對方，但見他谷到滿面通紅兼流晒汗，維持數秒便放下她，薛家燕忍不住說：「攞佢命！辛苦晒……」不過，大家要求再Encore，索晒氣的天華不禁說：「一日只能做一次，要等24小時之後先得。」可是薛家燕出動「心心眼」兼合十求再抱，最後他在4名壯男傍實下完成使命。
預告戰衣好少布
事後，天華表示今次是薛家燕親自打來邀請，但做其嘉賓有壓力，因對方極具分量，她在旁即笑問：「體重嗰種分量？」她又指已減去6、7磅，今次服裝有些是近年很少穿：「設計師話啲布好貴，所以好少布喎！」問到是否要騷事業線？天華即抵死說：「60年嘅事業喎！你知佢事業心重嘛！」講到公主抱，薛家燕自言很多人都想抱她：「黎小田都想o架！但怕我跳咗上去會一齊跌晒落地，你知佢唔夠高啦！」天華指是危險動作，切勿模仿：「依家隻手揸咪仲震緊！」
