余思霆台慶戰衣Deep到落肚臍
前華姐余思霆昨日出席明珠台《香港壁球公開賽》電視獨家直播記者會，透露今天台慶會與40多人一起表演舞蹈，並自爆準備了性感戰衣：「前面少少Sexy，後面冇乜布，我好鍾意呢件衫，係自己揀嘅，又靚又性感。（驚唔驚走光？）有遮番少少，本身Deep V到肚臍。」
同場的翟威廉則準備與一班人彈奏樂器，笑言抽獎最緊要大家開心：「我抽中過1萬蚊，嗰晚請大家打邊爐都冇咗6、7千！」提到經常在社交平台與好友直播Jam歌，他自言在不知不覺間轉型為半KOL和半藝人。問到做KOL是否更好賺？他坦言：「喺我嘅個案，KOL商業性高啲、前景好啲，不過仲需要時間揣摩。」