暖爸黎諾懿靠B發圍衝擊視帝

擺脫5億駙馬之名

講起黎諾懿，不少觀眾都會聯想「5億駙馬」及《愛．回家》的「馬壯」，為洗脫過往形象，他不斷努力求突破，今年終遇到「度身訂造」的劇集《BB來了》，戲裏戲外均是新手爸爸的他演活角色，劇集收視及口碑極好，獲一眾師奶力捧。繼去年他在馬來西亞及新加坡的頒獎典禮上，分別以《燦爛的外母》及《不懂撒嬌的女人》奪「最喜愛TVB電視角色」後，今年再下一城向視帝進發。久違香港頒獎禮的他感觸說：「終於可以入番核心內圍，可以角逐視帝，8、9年真空期，所有頒獎禮都冇份，都有問過點解會係咁，真係好大感觸。」

跳舞斷腳趾奪冠

問到是否揀錯路？他坦言有得揀，入行10年事業毫無起色，想放棄時參加大陸真人騷《舞動奇跡3》，並奪得冠軍，瞬間備受矚目：「當時因為練習得太多，練到腳趾斷咗，拍檔金晨同我講跳唔到就唔好跳，即時男人嗰種不服輸令我更想跳落去，於是返香港求醫，原本做手術但冇時間，醫生幫我放血、去腫，再返去跳，依家腳趾都有啲變形，唔可以再做腳掌跳，但都值得，攞咗冠軍令我事業上多咗好多選擇。」

李佳芯與黎諾懿首次合演劇集，演活新手父母的苦與樂。	黎諾懿與朱慧敏合演《愛》劇，情侶形象深入民心。	黎諾懿全力搏殺，太太在背後默默支持。

獲獎後各種工作排隊送上門，他說：「嗰時好吃香，大陸、台灣同香港都有人搵，但我選擇咗香港，到依家都唔敢評論係咪錯，大陸搵我拍劇一集有6位數字，但我同太太商量過，好想喺香港做番啲嘢，可能係我唔甘心，我覺得想喺呢個冇理由唔得嘅地方發展，之後就拍咗《愛．回家》，所以我最難忘『馬壯』呢個角色，因為佢令到香港人再次認識黎諾懿，我重新起步，估唔到一拍就4年，雖然過程有啲漫長，但我不斷微調角色，令演藝基礎更進步。」

早年黎諾懿北上參加跳舞比賽，幾經辛苦奪得冠軍。	黎諾懿很想上台攞獎，多謝幫過他的人。	黎諾懿堅決留守香港市場，結果證明努力冇白費。

刻意演賤男求轉型

「馬壯」令黎諾懿成名，但亦失去不少機會，始終處境劇未能令他一炮而紅，加上每星期拍足7日，被迫放棄商演、登台及其他工作，他說：「直至今時今日，我想整死『馬壯』，因為太深入民心，無論我做咩角色，啲人都覺得我係『馬壯』，形象根深柢固，所以呢兩年接嘅角色都比較另類，刻意演賤男人同埋姊弟戀，『馬壯』幫到我，但亦令我到咗一個樽頸位！」

問到有否後悔沒有選擇到大陸發展？他說：「所以之前都話唔知有冇揀錯，嗰時好多機會，但我覺得將來有機會賺番。（錢對你嚟講唔太重要？）係唔甘心，冇理由喺香港唔得嘅，太太成日話『你一部一部Benz推落海』，唔緊要，我賺得番，依家心態希望喺香港再叻仔啲，先再向外衝。」

戲裏戲外做自己

今年黎諾懿爆紅，已為人父的他拍了《BB來了》，暖爸形象入屋，問到無綫是否為他度身訂造角色？他說：「我都問過監製，我覺得唔多唔少有關係，我真係新手爸爸，好自然咁將新手爸爸嘅感覺演出嚟。之前亦冇諗過咁高收視、觀眾反應咁好。我本身好錫小朋友，戲裏戲外都係新手，戲裏照顧個女，戲外照顧個仔，黑眼圈唔使化妝已經出晒嚟。拍BB仔戲好難，所以好少人拍，開拍前覺得監製傻咗，拍BB戲有好多控制唔到嘅事發生，再加埋若果其他對手發脾氣，都會影響進度。但好好彩，我同李佳芯第一次拍檔，遇到個好對手，佢性格大開大合，鍾意同唔鍾意會直接講出嚟，唔使估估吓。我見佢付出好多，我係新手爸爸，但佢唔係媽咪，冇接觸過初生BB，開頭佢都驚，下苦功做就好好。」

「想多謝幫過我嘅人」

問到有否信心在年底的頒獎禮爭視帝？他坦言：「我可以講好想攞，獎項係答謝嗰年幫我嘅人，到呢個歲數，我好鍾意攞獎，好想畀人知『你今年幫我係值得嘅』，亦好想喺公開場合多謝佢哋。但如果攞唔到，亦唔會好似以前咁唔開心，始終獎得一個，做到最Top嗰個係好開心，因為我都攞過冠軍，知道嗰個喜悅嘅心情的確唔同，個焦點喺晒你度，贏就係贏，輸就係輸，成王敗寇好啱，冇得呃，其他嗰啲都係安慰嘅說話。我當然想做最Top，但如果攞唔到就再加把勁，男人都仲可以等一等，下年再攞到個更好嘅角色。」