任達華失控一個鏡頭拍6粒鐘
影帝任達華遇到入行以來最大的挑戰，於新戲中扮演視障人士的他，被合作的導盲犬「考起」，一個鏡頭竟拍足6小時，難怪以「不可控制」來形容！
任達華、羅仲謙、郭晉安、楊采妮及袁澧林等，昨午於灣仔出席星皓電影《小Q》開鏡禮。該片取得當年日本經典電影《導盲犬小Q》的版權改編，稍後會拉隊到日本取景，預計明年1月左右拍完。
家中培情
飾演視障人士的任達華，早前拍一場與導盲犬過馬路戲，搞到影帝也被考起：「我要眼神冇焦點，盡量唔好眨眼，感覺好迷惘咁由隻導盲犬帶我過紅綠燈，人狗合一呀！結果48 take、拍咗足足6個鐘先完成一個鏡頭。小朋友同狗真係最難拍，加上今次好多室外戲有雜音，會影響狗狗嘅表現，要兼顧嘅嘢好多。今次嘅角色真係非常難，只可以用『不可控制』四個字嚟形容。」為了與導盲犬增強互信，他先後帶了七隻狗狗回家暫住：「搞到我個女隻狗呷晒醋。」
謙仔認蠢
至於謙仔飾演導盲犬訓練員，為投入演出，事前他接受約20小時的專業訓練：「導盲犬聰明過我，係我蠢咋！佢哋識分左右、前後、搵樓梯，好犀利，我就負責幫佢哋『執金』，不過都做慣，我屋企都有兩隻狗仔。」他指自己領犬的表現獲讚似模似樣，導演亦收貨。楊采妮扮演導盲犬寄養家庭成員，與郭晉安合演夫婦，「拋夫棄子」來港開工的她說：「我好掛住佢哋，導演好好，集中拍我啲戲份，等我可以間中返吓新加坡睇吓佢哋。」
