蕭芳芳大學時期兩訂婚全撻Q！
蕭芳芳前晚出席活動時大爆料，詳談讀書、愛情、工作等話題，更自揭埋藏多年的神秘情史，原來她曾經三年內兩度訂婚，但最後都取消婚約，結束愛情卻復活了生命！
影后蕭芳芳前晚到香港大學錄影清談節目，與大學生分享鮮為人知的秘密，談到感情生活時，原來她當年讀大學時，三年內兩度訂婚，一位是大男人主義的中國人，而另一位是外國人，令全場嘩然，她直言後來取消婚約：「詳情就唔講啦，但結束了愛情，復活了生命。」大家即報以掌聲。
母憂留學失身
眾所周知芳芳曾有兩段婚姻，前夫是秦祥林，現任丈夫是張正甫，並育有兩女，講到當年繼續拍戲的原因，她更自爆兩個月就離了婚：「有人搵我拍戲就賺住錢先，點知拍完又繼續有，之後結咗婚，兩個月就離咗婚。」當年社會風氣較保守，思想前衞的她堪稱是新時代女性！
芳芳因當年幾乎三次升學夢碎而感觸落淚，幸好最後獲名伶譚秉庸幫她交學費。提到媽媽沒有陪她去美國讀書，她指媽咪很信任自己：「我飛之前，佢同我講美國啲小朋友出門之前，媽媽都會企門口派避孕套。長輩講嘢好含蓄，原來佢同我講性教育，叫我唔好失身，唔好亂嚟，諗都唔好諗！」但她直認與同學試過食迷幻丸，但對自己沒反應。
讚周星馳叻等佢都抵
而提到當年與周星馳拍《漫畫威龍》，芳芳大讚他功力厲害：「有一幕講我突然爆咗句『X你個街』，就將周星馳推落河，我以為自己爆粗嗰吓係笑點，點知入戲院睇，觀眾都冇笑，反而係笑佢跌落水嗰吓，所以佢好叻，我好服佢，佢係最用功、用心嗰個。喺片場唔講嘢，每一秒都諗點樣更精進，就算要我等佢一個鐘都抵！」
其後芳芳受訪時，提到15歲登台分帳後，發現不夠錢交學費，同時又因事與初戀情人反面，問到初戀情人可是謝賢？她笑說：「唔答得，你哋自己估啦！」她坦言一早預計會爆料，因現場反應很好，問到可會開棟篤笑？她說：「一定唔會，太辛苦！」