克勤變內地歌手報足稅
歌手李克勤前晚為黃翊演唱會任嘉賓，黃翊笑言兩人對上一次合作是1989年的劇集《淘氣雙子星》，克勤笑說：「竟然用『淘氣』形容我，依家應該用『長氣』嚟形容我哋。」他續謂兩人當年同一間唱片公司，但卻從未合唱，反而多年後終於同台。克勤又笑說：「我唱咗歌30年，依家變咗內地歌手。」黃翊即謂：「搵人仔係好事。」克勤笑言：「最緊要係報稅。」黃翊抵死問：「報足？」克勤笑言：「梗係！」
而另一嘉賓前Zen樂隊主音黃和興，則自爆膽粗粗問黃翊能否合唱：「佢最初冇應承，但尋晚畀佢捉咗上台，合唱咗一隻《I Remember You》，真係冇排過！」並透露將於12月與龍小菌舉行歌友會。
此外，台下捧場嘉賓有黎瑞恩、鄭敬基、阮兆祥、邵仲衡、謝寧、文佩玲、何婉盈、黎明詩、蔡立兒和老公、黃翊經理人鄭瑞芬等，令演唱會如群星敍舊會，充滿集體回憶。
