古天樂慶生全家木口木面
藝人古天樂快將生日，前晚透露會跟家人切蛋糕及食飯慶祝，更笑言自BB開始，每年生日都會影張木口木面的全家福，並自嘲是愛登士家庭，向來Cool爆的他講完也忍不住笑到標眼水！
前晚古天樂（古仔）、宣萱、陳豪、謝安琪、麥浚龍及鄭希怡出席活動，本月21日是古仔的48歲生日，他表示一定留在家慶祝，並笑說：「每年都係切蛋糕，跟住全家木口木面影張相，由我細個手抱到依家都係咁，一埋位就自動木口木面。」他邊說邊笑，更笑到流眼水：「媽咪每年都會下廚煮我鍾意嘅嘢食，生日要好意頭，會煮髮菜蠔豉、白切雞。（新年菜？）係呀！當新年咁慶祝，你話好唔好笑？（有咩生日願望？）身體健康，咁先可以大家坐埋一齊木口木面影張相。（一代一代咁傳落去？）愛登士家庭咁！」
陳豪拍劇受傷小兒科
好友宣萱指去年有送禮物給古仔，還反問對方是否記得，古仔笑說：「個個送禮物，我都要記住，我咪好唔得閒？不過我記得你送咗個爐畀我，好靚，我用過一次，自己一個打邊爐。」宣萱稱今年要送煲給古仔：「送個木口木面煲畀你，貼你個樣上去。」
至於陳豪稱最近拍攝劇集《殺手》，要積極健身及飲奶粉練大隻，提到劇中不少演員受傷，他認為拍動作戲難免有損傷：「我都有傷，不過比起我以前拍電影嘅經歷係小兒科，我試過碌落山、瞓屎渠、畀神枱壓、畀風扇車，以前真係用命搏，依家安全為上。」又透露稍後要到台灣取景，撞正小朋友學校假期，太太可能會帶三個小朋友一齊到當地。
