楊怡數口差靠謙謙管家

默契十足笑到妝都溶！

楊怡在《再創世紀》中飾演野心勃勃的女強人章明晞，與郭晉安是商界的雌雄大盜。繼《末代御醫》後，兩人再度合作，她大讚兩人默契十足：「就算係第一次合作嘅第一日，我哋都已經笑到妝都溶！因為大家都係大癲大肺嘅人，乜都可以攞出嚟傾，我哋嘅默契就係有安心嘅感覺，因為你信任對方，乜都可以同佢講，同佢溝通。」

講到最難演的一幕，楊怡坦言並非內心戲：「講到我同安仔會有摩擦同反目，我要襲擊佢，攞嘢去扑佢個頭，我好怕用錯力。仲有一場戲係要同周勵淇互摑，我真係寧願你摑我，好過我摑佢！」

鎖定目標實施Plan B

與羅仲謙結婚兩年，楊怡坦言下一步就是生兒育女：「我依家休息中，想慢慢調理好身體，生小朋友係計劃之內，但實質做唔做到，或者成果幾時有係唔知。所以工作方面暫時唔會接劇集，都係接啲輕鬆嘢。（但你哋長期分隔兩地﹖）佢主要喺內地拍劇，最長試過分開3個月，分得耐會去探佢，佢拍劇途中又會返嚟，所以都冇問題。我哋成日都有傾電話同視像，我覺得兩個人唔需要日日見。」至於會否希望夫妻檔拍住上？她明言不會刻意要求合作：「如果角色同時間啱就冇所謂。（都係飾演夫妻？）到時睇清況，好難講，好難想像，如果真人騷都OK。」

對楊怡來說，拍劇最難的是郁手郁腳。	事業逐漸放慢腳步，全為生B做媽媽。	楊怡與羅仲謙從不過問對方的收入。

身家有幾多？你清我楚！

章明晞甘願為金錢放棄愛情，楊怡真實性格卻與角色大相逕庭：「我覺得家人重要過一切，權力同金錢係無止境，我唔係一個追求呢啲嘢嘅人。」她又坦言對數字沒有概念，笑說：「有時都唔知銀行戶口會唔會少咗個零！」她不懂投資，幸而媽咪對股票有研究，亦有眼光，所以很放心將財務交由媽咪打理，與老公羅仲謙則財政獨立：「我哋冇聯名戶口，覺得唔需要，但知道大家有幾多錢。（老公會唔會畀家用你？）我冇家用概念，冇話男人要畀家用女人，你想買嘢咪問佢攞囉，佢負責全屋水電煤屋租、所有支出，我負責畀錢媽咪，因為佢係負責煮飯嘅人。」

服裝：Quarter

髮型：Hanmi Hair

化妝：TY

場地：香港九龍東皇冠假日酒店