韋家雄再婚咀到天黑老婆畀119分

韋家雄與鄧楚雅（Keynes）拍拖不足一年決定結婚，並於昨日正式拉埋天窗。昨晨9時許，家雄率領兄弟團往接新娘，幾位兄弟楊明、戴耀明、葉暐及易智遠等跟他一樣，都是綠葉出身，位位都「熟口熟面」。

約11時半，一對新人與兄弟姊妹團離開酒店出發往男家，心情興奮的兩人應要求多次咀嘴，閃爆現場。曾經失婚的家雄今次「大叔的愛」甜蜜爆燈，難怪心情超緊張，前一晚更失眠。他透露依足傳統儀式，亦有玩新郎環節，笑說：「我會記住呢鑊！我哋跳舞、又要揈波同食芥辣，仲要答啲好難嘅問題，都答錯。（有冇講愛的宣言？）有，我講得好認真，都係嗰三個字，I Love You。」Keynes表示十分滿意，更互給對方110分。家雄表示會到泰國探太太的親戚兼度蜜月，之後再去台灣，一直休息至10月底。

豪語幫老公頂酒

一對新人晚上在酒店筵開28席宴請親朋，他們換上禮服見傳媒，Keynes身穿白色低胸婚紗，家雄穿上全套粉藍色禮服，兩人切結婚蛋糕後交杯，並化身接吻魚狂咀！家雄說：「今晚主題係幸福快樂、開開心心，會場個布置係太太揀，佢鍾意樸素顏色，所以我都要着粉藍色。」Keynes隨即大讚老公好看！

家雄稱晚上沒有特別儀式，只會上台講幾句：「大家見證我哋，開開心心食餐飯。（你飲唔飲得？）我可以飲好多，但會醉，反而幾個兄弟好飲得，大家隊佢哋啦！」問到Keynes會否擔心老公飲醉？她笑說：「唔驚，我幫佢頂。」

太太鍾意我夠靚

提到上午接新娘時，家雄指氣氛開心沒有喊，但被太太踢爆：「佢有！佢接我時眼濕濕，我都有眼泛淚光，好感動。」至於婚後會否積極造人？家雄坦言會先享受二人世界：「唔想咁快搞到太太脹卜卜，有計劃生小朋友，但未開始。」問到最欣賞對方甚麼？他說：「靚！我好着重外表，太太都係鍾意我靚，盡在不言中。」Keynes即笑他浮誇，但現時要給他119分，比早上高，分數不斷飆升。