余香凝余潔滢愛爭風呷醋
藝人余香凝與妹妹余潔滢雖然只差四歲，但香凝卻常擺出家姐款，揚言小時候經常吵架，打交更是家常便飯，但經歷父母離異，二人相依為命，加上兩姊妹相繼入娛樂圈，互相照應下，關係變得親密，不時傾心事兼齊做運動Keep Fit。
兩姊妹日前跟Dear Jane主音Tim的妹妹Rebecca學做空中瑜伽，姊妹合拍非常，不單止樣貌相似，連做運動動作亦十分一致，似是心有靈犀。提起童年往事，你一言我一語滔滔不絕。
少不更事 腳邊瀨尿
姊：細個感情唔係咁好，我哋成日打交，雖然年紀相差四年唔係好遠，但我都會成日擺家姐款，覺得你應該要聽我講，我承認自己好衰，成日會點佢做嘢！
妹：我記得好細個嗰時，有次家姐叫我洗碗，我喺床上瞓晏覺唔想郁，跟住佢就入房扯咗我落床，連人帶被扯我落地下。
姊：我哋細個真係會打交爭嘢，有次媽咪買咗隻手鈪送畀我，但妹妹又想要，我哋就喺床上面攞住手鈪一人扯一邊，之後手鈪斷咗，當時我坐喺床邊，拉斷嗰一刻成個人跌咗落地。
妹：又記得我仲係BB時唔懂事，試過攞支原子筆插落家姐隻手度。
姊：係，嗰時仲留咗個印喺隻手度好耐。同埋佢仲係BB用緊尿片時，有一次佢爬喺我腳上，突然隻腳感覺到熱熱哋，原來佢喺我隻腳附近瀨咗尿，講起都好多趣事！
父母分開 匿埋爆喊
隨着父母的分開，跟隨媽咪住的她們，關係變得密切，互相照應。
姊：其實我哋好多秘密係媽咪、爹哋唔知，發生咩事都唔想媽咪擔心，就會互相講秘密。最深刻係父母分開嗰時，大家好相依為命，我讀緊中六，每日放學都係我照顧妹妹飲食，大家都好唔開心，但因為我係家姐，會更加照顧佢，驚妹妹頂唔順。
妹：嗰時家姐放學返嚟煮嘢畀我食，夜晚又會出去溫書，因為佢要考公開試，佢一離開屋企後我就即刻崩潰，狂喊，因為唔想佢擔心，所以唔會喺佢面前喊。
姊：佢唔係好表露心事，我就因為係家姐，就算唔開心亦唔敢太表現出嚟，雖然父母分開咗，但我冇嬲過佢哋，呢樣嘢我細個已識諗，兩個人一齊最重要佢哋開心，如果相處唔開心，分開係最好嘅方法就分開，我哋跟媽咪，但同爹哋關係都好好，成日一齊食飯。
性格迥異 少傾心事
踏入少女時期，會否互訴感情事？
姊：我都成日畀意見佢，但又會擺起個家姐款，唔係幾好，會成日問佢有冇拍拖？有時畀張相我睇，但又唔講詳情，咁我就會自己做偵探咁上網搜查，喺佢Facebook四圍搵啲蛛絲馬迹。（你會否同細妹分享感情事？）大個咗同佢分享多咗，佢有時會畀到啲我估唔到嘅意見，佢諗嘢好通透，我覺得自己比較衝動，嗰刻有咩諗到就講出嚟。
妹：但我始終覺得同佢有小小代溝。
姊：佢打機好叻，半個宅女。
妹：放假如果冇活動，我鍾意留喺屋企煲劇、打機、睇動漫。
反對入行 鬧者愛也
兩姊妹相繼入娛樂圈，早過妹妹入行的余香凝直認曾反對妹妹，怕她未能應付。
姊：佢入行我最初都擔心同反對，驚佢應付唔嚟，因為我已經算靜，佢比我更靜，而且由細到大成日病，驚佢應付唔到OT、通宵拍戲，又驚佢畀人呃，成日提佢唔好同啲人講秘密，我家族通病就係好易同人講心底話，但有時有啲人未必係同你交心，所以當時反對佢嘅態度都好惡，語氣好重咁鬧佢，搞到大家都喊。
妹：當時都好唔開心佢咁惡，但我真係鍾意做戲、做模特兒。
相似度85% 點錯相！
余香凝與妹妹余潔滢樣貌相似度達85%，難怪常被人認錯，最容易分辨的是妹妹骨架較細，比較纖瘦。問到有否試過被認錯，余香凝說：「成日都有，試過有次有朋友喺街度話見到我，同我打招呼，但我唔理佢，後來先知佢講嗰個係阿妹，呢啲情況成日有，會畀人感覺我好寸唔識人，所以如果大家見到我，我唔應你，咁嗰個應該係阿妹。」
場地：Flex studio
姊：余香凝
妹：余潔滢