城城撐婆媳和諧湊女靠WiFi

楊千嬅與郭富城分別忙住拍劇及拍戲。

郭富城、楊千嬅及鮑起靜等昨晚出席電影《麥路人》感謝宴，現正拍攝兩部電影的城城被問到是否沒有時間湊女？他說：「世界進步咗o架喇！呢個世界仲有WiFi，都唔使同我擔心。」談到太太方媛被指極速佗第二胎，日前又有傳霸住個女，搞到城城母親難享湊孫樂，問他是否成為磨心？城城說：「完全冇啲咁嘅事，呢啲憑空想像出嚟嘅小說，只要我有電影及演唱會，就會無啦啦出嚟，憑空想像嘅劇情，見怪不怪，係毋須解釋，總之我依家過住健康、快樂同和諧嘅家庭生活，對呢啲不實新聞我只講一次。（婆媳關係OK？）當然啦！」

樂意分享好消息

問到太太是否佗B？他風騷說：「我一直都講，大家睇住我成長，好關心我屋企，但講得太多，大家注意力集中我家庭上，我都好樂意同大家分享，我講過，自己好鍾意小朋友，但有啲嘢暫時無可奉告，畀啲空間我啦！總之適當時候自然就會講，上天會有安排，添幾多個小朋友交畀個天啦！總之有好消息會同大家分享，但呢一刻無可奉告。」

眾演員出席新片感謝宴開心切蛋糕。

城城平時要遙距湊女，昨與小演員玩過吓癮。

傷尾龍骨針灸累事

而千嬅被問到拍攝劇集《多功能老婆》因遲到辣(慶)陳煒的傳聞，她說：「其實都冇咩要回應，成日都有呢啲新聞，反而拍呢套電影試過遲到，拍劇都遲過兩、三次，因為啲通告太密，但都係遲廿分鐘內嘅事，我自己會打畀監製陳寶華自首，呢啲嘢一定要做。」又指有次因傷及尾龍骨要針灸，搞到拍這齣電影時遲到：「我等嘅時間又唔計嘅！」她稱重點是完成兩個很好的作品，說到有指陳煒等到火都嚟？她說：「唔清楚喇！如果係，點解依家先寫？都拍到四、五個月啦！呢啲嘢天知道點解咪得囉！」