翠如自嘲唔襟老（抓）演森美阿媽
森美近日與黃翠如合作拍劇做「男一」，落足力瞓渠邊都冇Say No，提到被嘲年紀大唔襯翠如，翠如即自嘲不及男演員「長青」，可能過兩年就要演森美阿媽，又自爆曾做對方身邊的「臨記」！
藝人森美與黃翠如早前在長沙灣為無綫新劇《過街英雄》拍外景，當日氣溫高達34度，二人在烈日當空下在街頭拍攝追逐戲，非常辛苦！森美首次夥拍翠如做「男一」，在高溫下跑足幾個Take，即使要在坑渠與積水邊趴地亦毫無怨言，而當翠如趴地時，森美更上前扮對方逗她玩，難怪台前幕後都大讚他Nice！
齋鬥氣唔談情
二人當日拍攝相遇戲份，翠如一見面即掟爛森美的手機，笑言雙方在20集中鬥足19集！問到可有機會談情？翠如笑說：「冇啦！所以劇組安排咗個女神譚凱琪畀佢，佢哋已經肉帛相見咗喇！」記者笑問森美是否以「襪仔」遮住重要部位？他說：「唔係，未到呢幕，隻襪仔拍完可以拎去拍賣喎！」
森美又透露老拍檔小儀得知他與翠如合作，即挖苦他年紀太大，很難湊成一對，翠如對此笑說：「又唔會呀！依家做住你阿妹先，過多兩年我可以演你阿媽！」談及首次與森美合作拍劇，翠如自爆多年前曾在電影中做「臨記」，當時的主角是森美：「佢都話唔記得有我，我出場幾秒咋！估唔到依家可以高攀佢！」