44歲利嘉兒誕7.2磅得意女
曾經歷兩次小產兼屬高齡產婦的藝人利嘉兒，終奮戰成功於本月19日誕下7.2磅重的可愛小公主，並取名為劉書雅（Karyssa）。榮升人母的她大爆老公被剛出世、血淋淋的小生命嚇親，原本要拍下剪臍帶過程亦宣告失手。
現年44歲的利嘉兒（Lily）與從商的老公Bong結婚8年，曾不幸經歷兩次小產，最終亦得償所願造人成功，日前誕下重7.2磅女兒。榮升人母的她，為女兒改名劉書雅，英文名Karyssa，希望女兒有書卷氣，在濃濃的愛包圍下成長。照片中，見抱着女兒的Lily難掩幸福，另一張相見Bong輕吻女兒額頭，Lily則深情望着女兒，畫面十分有愛。
「連覺都唔想瞓」
Lily接受本報電話訪問時，透露BB在颱風「山竹」襲港後出世，感受難以形容：「姑娘放喺我手度感覺好得意，心諗嘩呢個邊個嚟？以後就係我同佢最親，以為會好感動會喊，點知冇，可能麻醉藥未過，後尾個人醒晒就好掛住佢，連覺都唔想瞓，一對住佢好想錫佢、攬住佢，我諗每個媽咪都係咁，真係好開心。」她指女兒重磅又表情多多，出院後與女兒度過首個中秋節。
蝦碌拍唔到片
小生命誕生當然帶來喜悅，Lily更大爆生產時老公的趣事：「佢一早預備咗入嚟剪臍帶，以為就咁剪好簡單，入嚟嗰刻咁啱見到BB喺肚入面出嚟好血淋淋，都有啲嚇親。之後外籍麻醉師問老公剪臍帶時要唔要影Video，點知佢拍完睇番Playback，原來係冇嘢錄到，但老公話唔緊要，最珍貴嘅畫面已經留喺心中同腦中。」她指見到女兒健康成長，有個開心和有意義的人生，就是做父母最大的心願。
